صفحہِ اول

ہفتہ, مارچ 23, 2013

" مارچ 23 " ایک تاثر

ہم زندہ قوم ہیں اور انشاء اللہ ہمیشہ رہیں گے"۔
A day to revive commitment
۔۔۔1995 میں ایک برطانوی مصّنفہ کے ہمارے پیارے ملک کے بارے میں تاثرات پڑھے جو ظاہر ہے تلخ تو لگے پر حقیقت پرمبنی بھی دِکھتے تھے۔۔۔ اُس نے کہا تھا "ایک وقت تھا جب یہ قوم(مسلمان) ایک ملک کی تلاش میں تھی-آج یہ ملک (پاکستان)ایک قوم کی تلاش میں ہے"۔
  میں سوچتی ہوں اور میرا پورا یقین ہے اس بات پر کہ ہمارا پیارا ملک پاکستان ہم سب کے لیے اللہ کی خاص رحمت ہے- یہ کوئی جذباتی جملہ نہیں۔ 1947 سے تاریخ اُٹھا کر دیکھی جائے ہمیں یعنی عوام اور ہمارے پاکستان پرکون سے ستم نہیں ڈھائے گئے-اشرافیہ اور باہر کی دنیا کے چالباز جواریوں نے ہماری کس کس مقام پر نہیں لوٹا - جس کا جہاں داؤ لگا وہ اس تاج و تخت کو تاراج کر کے ہی گیا -اور گیا بھی تو اس وجہ سے نہیں کہ ہم نے اس کا ڈٹ کر مقابلہ کیا اوربھگا دیا۔ بلکہ یا تو اس کا وقت پورا ہو گیا تھا یا قدرت نے اس مال ِغنیمت میں اس کا اتنا ہی حصہ مقرر کیا تھا۔بہرحال جو بھی آیا اپنی خوشی سے واپس نہیں گیا۔
 یہ لوٹنے والوں کے منہ پرایک طمانچہ ہے اور ہمارے لیےاللہ کی طرف رُجوع کرنےاوراپنے قول وفعل سے شُکر گُزاری کا اظہار کرنے کا ایک موقع ہے- یہ تو اُن شیطانی قوتوں کا احوال تھا جنہوں نے ہمارے سروں پر مسلّط ہونے کی کوشش کی اور رب کے کرم سے ہم ہر بار ایک نئے عزم سے اُن کے مکروفریب سے جان چُھڑا پائے۔
 اب کچھ ذکر ناگہانی آفات کا بھی ہو جائے۔ ہماری آزمائش کا سلسلہ یوں جاری رہا کہ کبھی زمین کی گہرائیاں اورآسمان کی وسعتیں ہم پر تنگ ہو گئیں۔۔ ۔شہر کے شہر اُجڑ گئے۔۔۔ کبھی ہمارے اپنے تخلیق کردہ لوازماتِ زندگی کے اثرات آگ لگا گئے۔۔۔تو کبھی بدترین زمینی اور فضائی حادثات نے سیکنڈوں میں قیمتی زندگیاں صفحۂ ہستی سے مٹا ڈالیں- کیا کچھ نہیں ہوا ہم عوام کے ساتھ اور ہمارے ملک پاکستان کے ساتھ۔۔۔ہمارے عظیم مُحسنوں کی ٹارگٹ کلنگ ہو یا قومی اداروں پر دُشمن کے ناپاک حملے- اور تو اور جو یہ سب کرنے کی طاقت نہ رکھتے تھے وہ دوستی کا خوشنما لبادہ پہن کر ہماری اخلاقیات اور تہذیب کو تباہ وبرباد کرنے کے درپے ہوئے- یہ سب ہماری نظروں کے سامنے اور ڈنکے کی چوٹ پر ہوتا رہا اور یہی لوگ تھے جو ہمیں بُزدلی اور بےغیرتی کے طعنے دیتے رہے اور قیام ِپاکستان کے جواز کو بھی مسترد کرنے سے نہیں ہچکچائے- وقت کے فرعون تاریخ بنانے کے غرور میں تاریخ بدلنے پر تُل گئے- قائدِ اعظم کی ذات میں کیا کچھ خامیاں نہیں کھوجی گئیں ہوا یوں کہ ہم چُپ چاپ سہتے چلے گئے تو اُن کے حوصلے بڑھتے گئے۔نشانے خطا ہونے لگے تو ان کے پاس کچھ باقی نہیں بچا سوائے اپنی گھسی پٹی چالیں دُہرانے کو۔
 پراب ہم جان گئے ہیں کہ " پاکستان ہمارا ہے اور ہم ہی اس کے رکھوالے ہیں"- پاکستان بچانے کے جھانسے میں نہیں آنا
 یہ دُکان داری چمکانے کی باتیں ہیں- دل ودماغ کشادہ کرنا ہے کسی کی نیت پر شک نہیں کرنا۔جو جس راستے پر ہے جانے دو پراپنا قطب نما ساتھ رکھو- ہمارے لیے اللہ کافی ہے اور اللہ سے ہی مدد مانگنا ہے- اتحاد میں طاقت اور کامیابی ہے ایک اکیلا جتنا بھی مخلص ہو اپنی ہمت سے بڑھ کر بوجھ نہیں اُٹھا سکتا - اپنی عقل سے کام لے کر اُس کا ساتھ دینا ہے جو نظریے کی بات کرے۔۔۔ ملکی وقار اور خود مختاری کو مقدّم جانے۔۔۔ ذاتیات سے بلند ہو کر اُصولوں کو فوقیت دے- یاد رہے کسی آزمائے ہوئے کو ہرگز نہیں آزمانا۔ ہمارا دین بھی کہتا ہے کہ مومن ایک سوراخ سے دوسری بار نہیں ڈسا جاتا-اتنے سالوں اَن جانے میں لُٹتے رہے ،وعدوں پر اعتبار ہمیشہ کرتے چلے گئے اور وعدے کبھی وفا نہ ہوئے۔اوراعتبار اب بھی کرنا پڑے گا کہ میدان خالی نہیں چھوڑنا۔
 جہاں تک ہو سکے اپنے حصے کا کام کرنا ہے اُس چڑیا کی طرح جس نے آتش ِنمرود میں اپنا حصہ ڈالا تھا- عزم بلند اور حوصلہ جوان رکھنا ہے- یہ ملک ہمارا گھر ہے اور ہم نے ہی اس کو سنوارنا ہے- کوئی بھی انسان فرشتہ یا جن نہیں ہو سکتا کہ کبھی غلطی نہ کرے یا پہلے سے کی گئی غلطیوں کی لمحوں میں تلافی کر سکے۔ہمیں کُھلے ذہن کے ساتھ ایک عام انسان کو ایک موقع دینا ہے اس یقین کے ساتھ کہ کوئی ہمارا بال بھی بیکا نہیں کر سکا اور نہ کر سکتا ہے جب تک ہم خود سمجھ داری سے کام نہ لیں- اگر کوئی تحفظات ہیں، خاموش تماشائی بننے میں ہی عافیت جان رہے ہیں تو پھر آئندہ بھی چُپ چاپ اپنا تماشا دیکھتے جانا ہے۔یہ ہم سے ہوتا نہیں کہ ہم فقط بھڑاس نکالنا جانتے ہیں۔۔۔ کبھی نہیں مانتے کہ جب کرنے کا وقت تھا تو ہم ہاتھ پر ہاتھ دھر کر بیٹھے رہے۔
!آخری بات
 ہمارے پیارےوطن پاکستان کی بنیاد ایک نظریے پر رکھی گئی تھی اور نظریہ ہی اس کی پہچان ہے۔ یہ پہچان جس نے ختم کرنے کی کوشش کی وہ خود  ہی نیست ونابود ہو گیا۔نظریۂ پاکستان کو اولّیت دینے میں ہی ہماری بقا ہے۔
۔" پاکستان زندہ باد نظریۂ پاکستان پائندہ باد"۔

1 تبصرہ :

  1. آپ کے بلاگ کے معیاری ھونے کا تزکرہ سنا تھا کہیں۔ واقعی آپکی اردو کافی اچھی ھے۔ لیکن یہ اور بھی موثر ھو سکتا ھے اگر آپ کچھ تبدیلیاں کر لیں۔ پہلی تو یہ کہ فونٹ تھوڑا سا چھوٹا کر لیں۔ اور دوسرا، کمنٹس میں
    name/URL
    کو ایکٹیویٹ کریں، تاکہ باقی لوگوں کے بلاگز تک بھی آپ کی رسائی ھو۔

    جواب دیںحذف کریں