" لمس سے لفظ تک"

محبت احساس کا نام ہے اورقربت اس احساس کا اظہار ہے۔۔۔ جذبوں کی روانی ہے۔۔۔ ایک بہتا مدھرچشمہ ہے جس پراگر لمس کا بند نہ باندھا جائےتو یہ بےفائدہ ۔۔۔ بےفیض چُپ چاپ دریا سے ہم آغوش ہو کر وقت کے گہرے سمندروں کی نذرہوجاتا ہے۔ یا کسی پُرشور ندی نالے سے مل کر نہ صرف اپنی پہچان کھو بیٹھتا ہے بلکہ تباہی وبربادی کی نئی داستانیں بھی رقم کرتا ہے۔
لمس کی اہمیت اس کی بےپناہ طاقت سےانکار نہیں۔ لمس جسم کا ہوتا ہے یا سوچ کا اور سب سے بلند تر کہیں تو روح کا اور پھر نور کا۔
لمس  کائنات کی سب سے بڑی لذت ہے لیکن حدودوقیود کے اندر رہ کر ہی اس کا ثمر پایا جا سکتا ہے ورنہ بظاہر خوشنما اوردل فریب نظر آنے والے پھل جان لیوا حد تک زہریلے بھی ہو سکتے ہیں۔

لفظ لمس کے بنا ادھورا ہےاورکبھی لمس اتنا طاقتور ہو جاتا ہے کہ لفظ اُس کے سامنے بےمعنی ہو کر رہ جاتا ہے۔لفظ کبھی گم نہیں ہوتے بس ہم ہی اپنی طلب کو سمجھنے میں ناکام رہتے ہیں۔

لمس خواہ محبت کا ہو نفرت کا یا پھردرد تکلیف کا بہت طاقتور ہوتا ہے۔نرم ونازک احساسات کو جڑ سے اُکھاڑ کر نئے سرے سے اُن کی نمو کرتا ہے۔ یہ مقناطیسیت محض لمحوں کا کھیل ہوتی ہے۔۔۔ برقی مقناطیس کی طرح ۔۔۔ اُس پل لگتا ہے جیسے سب ختم ہو گیا۔ لیکن اگرمحبت کا لمس وجود کو گل وگلزار بناتا ہے۔۔۔زمینوں میں زرخیزی کی مہر لگاتا ہے تو نفرت کا لمس تذلیل کااحساس بن کردوسروں سے اس کا بدلہ لینے پر اُکساتا ہے۔۔۔کبھی چوٹ کا لمس جسم پر نہ مٹنے والے نشانات چھوڑ جاتا ہے جن کے گھاؤ کبھی نہیں بھرتے اور نارسائی کا کرب احساس کو بنجر بھی کر دیتا ہے۔

 لمس کوئی بھی ہو اگراپنا انمنٹ اثر نہ چھوڑے تو پھرانسان کو گونگا یا بےحس بنا دیتا ہے۔ یہی وہ وقت ہے جب لفظ کی اہمیت کھل کر سامنےآتی ہے۔ پھر صرف لفظ ہی بچتے ہیں جو لمس کے احساس کو بچانے کی سعی کرتے ہیں ۔لفظ وہ نہیں جانتے جو ہم جانتے ہیں اور جو ہم جانتے ہیں وہ لفظوں میں بیان ہی نہیں کیا جا سکتا اور  حقیقت یہ بھی  ہے کہاحساس کو جب تک لفظ کی زبان نہ ملے وہ بےحیثیت ہی رہتا ہے۔

لفظ  روح کے زخم کا وہ مرہم ہے جو تمام درد اپنے اندر اُتار لیتا ہے اور مندمل کرنے کا کام وقت پر چھوڑ دیتا ہے۔لفظ پڑھے ہی نہیں جاتے محسوس بھی کیے جاتے ہیں، کبھی چُھوتے ہیں تو گُدگُدیاں کرتے ہیں،رُلاتےہیں،ستاتے ہیں تو کبھی دُوربھگا دیتے ہیں ۔ جب سنائی دیتے ہیں تو کبھی مرہم بنتے ہیں کبھی نمک ۔اِن کی نغمگی اگر کانوں میں رس گھولتی ہے تو نشتر بن کردل چیر بھی دیتی ہے۔ وہ لفظ جو ہمارے قریب آتے ہیں،ہماری سوچ کے لمس کو چھوتے ہیں یا ہماری زبان سے ادا ہوتے ہیں آئینے کی طرح ہمارا ہی عکس ہوتے ہیں۔کسی  کے کہے مسرور کریں تو ہمارے اندر کی کہانی سناتے ہیں اور ہماری زبان سے کسی کے سامنے ادا ہوں تو ہمارے اندر کا راز دوسروں پر فاش کرتے ہیں۔یہی لفظ کسی کو قریب لاتے ہیں، فاصلے کم کرتے ہیں تو کبھی اُن کی تلخی اور جہالت ہمیں بدظن کرتے ہوئے ہمیشہ کے لیے فاصلے بڑھا بھی دیتی ہے۔

لفظ ہیرے کی طرح ہوتے ہیں جس رُخ سے دیکھیں ایک نئے انگ میں مسحورکرتے ہیں۔احساس کو چھو جائیں تو پھول سے بھی زیادہ نرم ونازک ۔ نقصان پہنچانے پر آئیں تو جان لے کر ہی چھوڑتے ہیں۔انسان کا احساس بہت قیمتی ہے جو دوسری نعمتوں کی طرح رب کی انمول عطا ہے اور خاص ہے ان کے لیے جو خاص ہوتے ہیں۔اہم یہ ہے کہ اگر لمس اورلفظ کا تعلق بھی نہ رہے تو انسان اس وسیع کائنات میں اپنی ذات کے بھنور میں یوں ڈوب جاتا ہے کہ کوئی اس کی پکار سننے والا بھی نہیں 

ہوتا۔

آخری بات
لمس کی طاقت پرجو لوگ یقین رکھتے ہیں وہ اس کا اظہار نہیں کرپاتے۔اورجو اظہار کرتے ہیں وہ اِس کی طاقت سے بےخبرہی رہتے ہیں۔